Mar 15 | KQF | STEP | Olaolala kaikana Pilisi edi babada, waiḡake tauwailovelovena, waibabada bi bolu babadidi matabudi ai ḡemotidi bi ai ogatala. Kamaina bi Yesu nimana a pani, bi ai doli nawe gabeman isana Paelat nimanemo a sako.

c 15:34Sams 22:1

Mark 15

Yesu Paelat matanemo i moito

1 Olaolala kaikana Pilisi edi babada, waiḡake tauwailovelovena, waibabada bi bolu babadidi matabudi ai ḡemotidi bi ai ogatala. Kamaina bi Yesu nimana a pani, bi ai doli nawe gabeman isana Paelat nimanemo a sako. 2 Paelat Yesu i waitalayena gado, “Tam Diu edi guyau ee?” Bi Yesu ena giu i wai munena gado, “Emaso, kuna giugiuna mainana.” 3 Pilisi edi babada kauwa wapewapedimo Yesu ai wavu. 4 Kamaina bi Paelat Yesu i waitala munaḡena gado, “Ei, tam bai kwa giuwe ee geḡa? Kwa vaiye kauwa wapewapedi gebogebodimo sa wai wavum!” 5 Bi Yesu mote bamo bai i giu lubuḡe. Taunana aubaina Paelat i sove.

Diu babadidi a ḡoye te Yesu maso i peki

6 Paelat ena vaivaimo wala vawaitauli soina laḡannemo Diu lavedi bamo taunana lavana delimo a wai aninena taunana ya kaikamaḡe. 7 Mba ḡome oloto isana Balabas ena lava tauwaiḡaviya ḡesaudi vaitedi delimo a miyamiya. Tedi wala Roum gabemanina ena waibada ai ḡaviye bi lava a wai pekidi. 8 Lava kumna a tava Paelat lisinemo ai ḡemotidi bi ai baḡa te aubaidi, ena vaivaimo wala i voivoiyena mainana maso i voiye. 9 Bi tana i sibe kauwe te pilipilisi edi babada unula dabanemo Yesu tana nimanemo a sako. Taunana aubaina Paelat edi giu i waimunena gado, “Ko ḡoyeḡoyena Diu edi guyau yea kaikamaḡe aubaimi ee?” 11 Pilipilisi edi babada edi giumo lava kumna nuwedi a liuliuwe te Paelat sai baḡa te Balabas delimo ya kaikamaḡe tedi aubaidi, bi mote Yesu.

12 Bi tana lava i waitala munaḡedina gado, “Te bai kona ḡoyena yea voiye niga lavana ko wai isana Diu edi guyau lisinemo?” 13 Bi tedi a binauna gado, “Ku tupalatu!” 14 Bi Paelat i waitalayedina gado, “Bi bai aubaina? Bai gebona i voiye?” Bi kota a binau gulatana gado, “Ku tupalatu!” 15 Kamaina bi Paelat i ḡoyeḡoyena lava yai nuavisudi aubaina, Balabas i kaikamaḡe i nawa, bi ḡaviḡaviyidi i giuwedi te Yesu sa kwapu bi sa nawe sa tupalatu.

Tauwaiḡaviya Yesu ai namaḡe

16 Ḡaviḡaviyidi Yesu ai doli nawe Paelat ena vanuwa mataetinemo bi edi lava ḡesaudi ḡaviḡaiviyidi a giuwedi a tava te ai ḡemotidi. 17 Bi ḡome tedi gala molemolena Yesu ai kotena mai bena guyau ena gala kulina, bi donadona pipinina a voivoiyena a vai te kununemo ai kote. 18 Kamaina bi ai gwaigwaiye bi a binauna lisinemo gado, “Ebom, Diu edi guyau!” 19 Tedi diḡonemo kununa a kwapu, a kaniso tawatawa bi tuwapekedi ai tupa gwaliḡedi bi wainamaḡemo a laulauduneye mai bena guyau. 20 Tedi ai namaḡe i kovi bi gala molemolena a kaikamaḡe bi tana ena gala otina ai kote munaḡe. Kaka bi ai doli nawe tupalatuna aubaina.

Yesu a tupalatu

21 A nawanawa etamo te oloto isana Saimon a banavi, tana daibimo bi i saḡasaḡa Yelusalemmo malagai dididiginemo. Saimon tana Aleksanda bi Lupas tamedi tana Sailin lavana. Ḡome ḡaviḡaviyidi Saimon a egeli te Yesu ena kolosi i avali. 22 Tedi Yesu ai doli nawe Golgotamo, niga isana banina ba ‘Kunukoukou gabuna.’ 23 Ḡome tedi waen maa vaitena vitavitalena Yesu a vite lubu bi i daboke. ^{▼▼15:25Niga waenna maa vaitena vitavitalena ba yavi aniwai ubana.} 24 Ḡaviḡaviyidi Yesu a tupalatu bi ena gala a daḡilidi. Bi beyakulu wainasi a voiye te aiyai bi i vato kauwena ba gala ya legau.

25 Olaolalemo 9 okoloki bi Yesu a tupalatu. 26 Bi kai selipapinemo waigwaigwai giuna a kulina gado, “Niga Diu edi guyau!” bi kununa kavalinemo a sako. 27 Bi kota taudanedanene labu a tupalatudi Yesu vaitena, ḡemota kataiyanemo bi ḡemota ḡeniyanemo. ^{▼▼15:28Kulikulidi wadubodi buka ḡesaudimo lova 28 ba mote ima kenakena. Lova 28 ba niga mai i giu: “Tana a voiyena mai bena waiḡake tauwaikatikotona.” (Isa 53:12)}

29 Tedi mabai a velavelau teiyaḡina ba a waidiboḡi, kunudi a kwadiyedi bi a giugiuna gado, “Emata! Tam walanamo kuna giu te Maimaituwa ena vanuwa kwa koisuwasuwa bi laḡan faiona nopodimo kwa ḡala munaḡe. 30 Niganana kwai yawasani munaḡem bi kolosi modonaḡa kwa yovo!”

31 Kauwina ḡemoḡemotinemo pilisi edi babada bi waiḡake tauwailovelovena Yesu ai namaḡe bi tedi taudiḡa ai gwaigwaiyena gado, “Lava ḡesaudi i wai yawasanidi bi tana mote ḡemoḡemotina te i mai yawasani munaḡe! 32 Tana i giu te tana taunana Vinevinena, Islael edi guyau. Niganana kolosimo ya poti yovo ta kita, kaka bi tai sumaḡe.” Bi kota lava labu Yesu diyanemo a tupatupalatudina vaitedi tana ai diboḡi.

Yesu i peki

33 Kamaina bi 12 okoloki mba dobuna matabuna i waidudubala ee te suwala i tinamuli. 34 Suwala 3 okoloki bi Yesu kalinana dididiginemo i guletutuna gado, “Eloi, Eloi, lama sabaktani.” Niga giuna banina ba: “Egu Maimaituwa, Egu Maimaituwa, bai aubaina kuna gosegu?” ^c 35 Laḡannemo diyanemo taumoito noi giuna a aivaivaiye bi a giuna gado, “Ko vaiye, tana Elaidiya ^{▼▼Alamek Kalinedimo Eloi vaiyena mai bena Elaidiya.} ya yogeyoge.” 36 Lava ḡemota i velau tai i vai te kai isunemo i pani bi waen wai luluna ^{▼▼15:36Sams 69:21 noponemo i giuna gado, “Vinevinena kaka waen ḡolaḡolana sa vite.”} i taivai te maso Yesu i waitego. Bi i giuna gado, “Avena ta sula wailaba bi ta wai kita, bamoda Elaidiya ya nato bi kolosimo ya sako yovoḡe.” 37 Ḡome Yesu kalinana dididiginemo i lauaiyoi bi yawasina i tauvunu. 38 Bi Maimaituwa ena vanuwemo guduboyo i dawedawena i nuwalisi labu dabanemo te i yovo dibunemo i laukamaḡe. Niga guduboyona ba gabu waiwaiyawina guduna. 39 Ḡome ḡaviḡaviyidi edi bada kolosi pakanemo i moimoitona i kita te bainewa Yesu i peki, kamaina bi i giuna gado, “Giukauwa te niga lavana Maimaituwa natuna!” 40 Mba ḡome waivini ḡesaudi manemanekemo a waiwaikitana, nopodimo ba Meli Magdalin, Meli Diyemesi ḡaubona bi Dioses tinedi bi Salome. ^{▼▼15:40Metiu 27:56, Metiu ena bukamo tana Diosepa i kuli bi mote Dioses.} 41 Niga waivinidi wala Galilimo Yesu a kaikaiwata bi a sagusagu. Bi kota waivini ḡesaudi wala Yesu vaitena a natonatona Yelusalemmo ba ḡome vaitedi.

Diosepa Alimatiya olotona Yesu tubuḡina i vai bi tauyewamo i sako

42 Mba aubiganemo vononoḡa suwelina i kovikovi muliḡa kaka waiyawasi laḡanna yai tubu. Bi Diosepa Alimatiya olotona tana bolu badana ḡemota bi a vivivile, tana Maimaituwa ena waibadana ya natonatona i labelabe. Tana ma laudabatolana i nawa Paelat lisinemo bi i waibaḡa te Yesu taubeuna ya vai. ^{▼▼15:42-43Diu edi waiyawasi Palaide suwala bulubulumo i waitubu te Satade Suwala bulubulumo i kovikovi.
,} ^{▼▼15:42-43Diu edi waiḡakemo i giu te lava i pekina ba laḡanna ḡemotinemo sa dobo, taunana aubaina Diosepa i waipapalana, muliḡa kaka waiyawasi laḡanna yai tubu.} 44 Bi Paelat i tatava te Yesu kaikana i peki. Taunana aubaina ḡaviḡaviyidi edi bada i yoge bi i waitalayena gado, “Yesu i peki, ee?” 45 Kamaina bi ḡaviḡaviyidi edi bada Paelat i giuwe te Yesu kaikana i peki. Taunana aubaina Diosepa i wai anine te Yesu taubeuna kolosimo ya vai.

46 Diosepa gala potipotidi i kune tavaitedi bi Yesu taubeuna i sako yovoḡe bi galedimo i suma. Kamaina bi i avali nawe tauyewa pooa doudounemo i sako. Ḡome ḡakima dididiga tabatabana i ḡima bi tauyewa mataetina i waidougudu. 47 Meli Magdalin bi Meli Dioses tinana a kita te Yesu taubeuna bamo ḡome i sako.